ԱՍՏՂԱԾԱՂԻԿ - ASTERA (CALLISTEPHUS) - АСТРА

Պատկանում է բարդածաղկավորների ընտանիքին։ Հայրենիքը Չինաստանն է։ Գրունտային ծաղկեգործության մեջ միամյա աստածաղիկների դերը բավական մեծ է շնորհիվ նրանց բազմերանգ, գեղեցիկ ծաղիկների։ Բարձրության տեսակետից աստղածաղիկները կարելի է բաժանել երեք խմբի՝ բարձրահասակ, միջակ և կարճահասակ։ Դրանց բարձրությունը տատանվում է 15-90սմ․-ի սահմաններում։ Ըստ ծաղկաբույլերի ձևի և կառուցվածքի, աստղածաղիկները նմանվում են քաջվարդի և քրիզանթեմի, լինում են գնդաձև, աստղաձև և այլն, իսկ պսակաթերթիկների խտության տեսակետից ծաղիկները լինում են լիաթերթ և միաթերթ։
Բարձր (50-70սմ․) և միջինբարձրություն ունեցող (35-40սմ․) սորտերը մշակվում են պլանտացիաներում՝ կտրած ծաղիկներ ստանալու նպատակով։ Դրանք երբեմն օգտագործվում են նաև ծաղկային ձևավորումներում, կազմելով խմբավորումներ և փոխարինելով ամառվա առաջին կեսում ծաղկաթափ եղած բույսերին։ Թուփ ունեցող սորտերը օգտագործվում են շրջեզրերում և գեղազարդ այլ նշանակություն ունեցող ձևավորումներում։
Բարձրահասակ աստղածաղիկներից ուշադրության արժանի են հետևյալ սորտերը՝ Վիկտորիա 60-50սմ․, Հսկա վիկտորիա 60-սմ, Քաջվարդանման աստղածաղիկ 65սմ․, որոնց ամեն մի թուփը, ըստ Գ․Ե․ Կիսելյովի տվյալների, տալիս է 20 սմ․ տրամագծով 15-20 ծաղիկ։ Բավականին տպավորիչ է Ջայլամի փետուր կոչվող աստածաղիկը 70սմ․ իր ծաղիկի երկար ժապավենաձև պսակաթերթիկներով և վերջապես, Գիսաստղը 80սմ․ իր խոշոր և ուշ բացվող ծաղիկներով։ Միջահասակներից և կարճահասակներից ուշագրավ են հերկուլեսը 40սմ․ և Տրիումֆը 25սմ․, որոնք վերոհիշյալներից 2-3 շաբաթ առաջ են ծաղկում։
Աստածաղիկը հողի նկատմամբ այնքան էլ պահանջկոտ չէ, սակայն լավ է աճում պարարտացրած հողերում։ Լուսասեր բույս է, բայց վատ չի ծաղկում նաև կիսաստվերում։ Չնայած նույնանման խնամքին ու մշակության աշխատանքներին, կիսաստվերում աճած բարձրահասակ աստղածաղիկները արևի տակ աճածների համեմատությամբ 10-12 օր ուշ են բացվում։ Աստածաղկի մշակության աշխատանքներում կարևոր նշանակություն ունեն ոռոգումը և պարարտացումը։ Խորհուրդ է տրվում առատորեն ոռոգել, սակայն միաժամանակ չպետք է մոռանալ, որ ավելորդ խոնավությունը նպաստում է ֆուզարիոզ հիվանդության զարգացմանը։ Այդ վտանգը ավելի մեծ է այն դեպքում, երբ հողամասը պարարտացված է թարմ գոմաղբով։ Հետևաբար խորհուրդ է տրվում պարարտացումը կատարել մեկ-երկու տարվա փտած գոմաղբով։ Աստածաղիկները լավ աճում ու առատորեն ծաղկում են հանքային պարարտանյութերով պարարտացրած հողերում։ Սովորաբար աստածաղիկի ծաղկումը սկսվում է ամառվա երկրորդ կեսերին և տևում մոտավորապես 20-30օր։
Սերմը գորշ դարչնագույն է, սեպաձև, սուր ծայրով, 2,5-3 մմ երկարության, երբեմն էլ լինում է փոքր-ինչ մուգ կամ բաց գույնի։ Ծլունակությունը պահպանում է 2-3 տարի։ Ծլում է 6-8 օրում։ Սերմերի հասունացումը տեղի է ունենում մոտավորապես սեպտոմբեր - հոկտեմբեր ամիսներին։ Սերմերը հավաքելու համար կիսաչոր, արդեն ծաղկաթափ գլխիկները չորացնելու նպատակով հավաքում և ըստ գույների փռում են ջերմատան կամ չորանոցի դարակների վրա։ Լրիվ չորանալուց հետո գլխիկները միջակ մեծության բջջավոր մաղերում տրորելով մաքրում և պահում են հետագա ցանքի համար։ Սերմերի մեկ գրամում հաշվվում է մոտավորապես 500 հատիկ։ Աստածաղիկը գազադիմացկուն չէ և խորհուրդ չի տրվում այն մշակել գործարանային վայրերում, ուր օդը վարակված է զանազան քիմիական նյութերով։