ՀՈՂՄԱԾԱՂԻԿ - ВЕТРЕНИЦА

Բազմամյա խոտաբույս է, պատկանում է գորտնուկազգիների ընտանիքին: Հողմածաղկի արմատները լավ զարգացած են, դրանցից առաջանում են երկար կոթուններով մի քանի տերևներ, որոնք բավականին խոշոր են, եռամաս, եզրերը ծածկված են կարճ մազիկներով, կենտրոնով անցնում է երկար ջիղը, որից դեպի եզրերն են գնում մի քանի ջղեր: Ծաղիկները կապույտ են, դասավորված բարակ ծաղկակոթունի վրա, 6-7 սմ երկարությամբ: Պատիճը կազմված է երեք մանր թերթերից, որոնք նման են բաժակաթերթերին: Բաժակը կազմված է վեց երկնագույն բաժակաթերթերից: Պսակը թերզարգացած է: Առէջներն ու վարսանդը շատ են: Հողմածաղիկը ծաղկում է ապրիլ-մայիս ամիսներին:
Քիմիական բաղադրությունը: Թարմ հողմածաղիկը պարունակում է ռանունուկլին, որը բույսի չորացման ժամանակ տրոհվում է պրոտոանեմինինի և գլյուկոզայի: Պրոտոանեմինինը տրոհվում է անեմոնինի, իսկ վերջինս իր հերթին` անեմոնաթթվի: Հողմածաղիկ բույսը պարունակում է նաև տանիններ, խեժանյութեր և սապոնիններ:
Օգտագործման եղանակը: Բժշկության մեջ օգտագործել են թարմ տերևները:
Բուլղարական բժշկության մեջ հողմածաղիկն օգտագործել են լյարդի բորբոքումների, լեղաքարային հիվանդության, փայծաղի հիվանդությունների բուժման համար:
Հայկական բժշկության մեջ հողմածաղիկն օգտագործել են միզաքարային և լեղաքարային հիվանդությունների, միզապարկի և երիկամների բորբոքումների, փայծաղի հիվանդությունների, լյարդի բորբոքումների բուժման համար:
1. 15 գ հողմածաղկի տերևներն աղալ, վրան ավելացնել 200 մլ ջուր, թողնել մեկ ժամ, քամել և օրվա ընթացքում կումերով խմել` լյարդի, միզապարկի, երիկամների և փայծաղի հիվանդությունների բուժման համար:
2. 5 գ հողմածաղկի չոր տերևների վրա ավելացնել 200 մլ ջուր, թողնել 3 ժամ, ապա քամել և օրվա ընթացքում կումերով խմել` լեղաքարային և միզաքարային հիվանդությունների բուժման համար: