ՇԱՂԳԱՄ - РЕПА - ТУРНЕПС

Երկամյա բույս է, պատկանում է կաղամբազգիների ընտանիքին: Արմատները կլոր են, ձվաձև կամ երկարավուն: Շաղգամի տերևները խոշոր են, կտրտված եզրերով, թավոտ: Այս բույսը կյանքի երկրորդ տարում տալիս է ծաղկակիր ցողուններ, որոնց ծաղիկները դեղին են: Պտուղը պատիճ է, սերմերը մանր են, մուգ շագանակագույն:
Քիմիական բաղադրությունը: Շաղգամի արմատը պարունակում է ածխաջրեր, սպիտակուցներ, վիտամիններ և միկրոտարրեր:
Օգտագործման եղանակը: Բժշկության մեջ օգտագործել են տերևը, արմատը, պտուղը:
Հայկական բժշկության մեջ շաղգամն օգտագործել են տեսողության վատացման, կանանց կաթի պակասեցման, միզարտադրության պակասության, դաշտանի խանգարման, որովայնի խիթքի, մաշկային ճաքերի, ստորին վերջույթների ուռուցքների, հոդատապի բուժման համար:
1. Հաճախակի շաղգամ օգտագործելը լավացնում է տեսողությունը, ավելացնում է կանանց կաթը, շատացնում է միզարտադրությունը:
2. Շաղգամը գինու քացախով եփել և ուտել` դաշտանի խանգարումների, որովայնի խիթքի բուժման համար:
3. Շաղգամն աղալ, քամել և մզվածքը քսել հոդատապին, ստորին վերջույթների ուռուցքներին և մաշկային ճաքերին` դրանց բուժման համար: