ՏԱՏՐԱԿ - ԽՈՃԿՈՐԻԿ - МАТЬ И МАЧЕХА

Բազմամյա խոտաբույս է, պատկանում է աստղածաղկազգիների ընտանիքին, ունի բարակ, սողացող արմատ: Ցողունն ունի 7-20 սմ բարձրություն և ծածկված է ձվաձև, կարմրավուն թեփուկներով: Գագաթին գտնվում է ծաղկաբույլ զամբյուղը: Տերևները դուրս են գալիս ծաղկելուց հետո և դասավորված են վարդաբույլի ձևով, երկար, բավականին հաստ կոթունների վրա: Տերևաթերթը հիմքում խորը սրտաձև է, կլորավուն, ոչ հավասար կտրտված եզրերով: Ներքևի կողմից տերևները ծածկված են սպիտակ մազմզուկների հաստ շերտով, իսկ վերևից կանաչ են: Ծաղկազամբյուղը կազմված Է մի քանի լեզվաձև, իգական ծաղիկներից և խողովակաձև, երկսեռ միջնամասից, ծաղիկներից: Բոլոր ծաղիկները դեղին գույնի են: Պտուղը սերմնարան Է: Ծաղկում Է վաղ գարնանը:
Քիմիական բաղադրությունը: Տատրակը պարունակում Է լորձանյութեր, դառը նյութեր` տուսսիլագին, ֆիտոստերին, տանիններ, ինուլին, դառը գլիկոզիդներ, սապոնիններ, կարոտիններ, գինեթթու, խնձորաթթու, պոլիսախարիդներ:
Օգտագործման եղանակները: Բժշկության մեջ օգտագործել են տերևները:
Բուլղարական բժշկության մեջ տատրակն օգտագործել են շնչառական օրգանների հիվանդությունների, թոքային խողովակահեղձուկի, ստամոքսաղիքային ուղու հիվանդությունների, մաշկային հիվանդությունների բուժման համար:
Հայկական բժշկության մեջ տատրակն օգտագործել են ձայնի խռպոտության, թոքային խողովակահեղձուկի, թոքային հյուսվածքի բորբոքային հիվանդությունների, ստամոքսաղիքային ուղու լորձաթաղանթների բորբոքումների, մաշկային հիվանդությունների, ստորին վերջույթների երակների լայնացման բուժման համար:
20 գ տատրակի տերևներն աղալ, վրան ավելացնել 200 մլ գ եռացրած ջուր և թողնել 6 ժամ, որից հետո քամել և օրվա ընթացքում խմել` թոքային խողովակահեղձուկի, թոքային հյուսվածքի բորբոքային հիվանդությունների, խռպոտության, մաշկային հիվանդությունների բուժման համար: Այդ նույնը թրջոցների ձևով կարելի է դնել ոտքերի երակների վրա` լայնացումը բուժելու համար: