ԼՈՇՏԱԿ - ПЕРЕСТУПЕНЬ

Բազմամյա խոտաբույս է, պատկանում է դդմազգիների ընտանիքին: Արմատը դեղնասպիտակագույն է, հաստ, մսալի, մարդանման: Լոշտակի ցողունները սողացող են, 1-3 մ երկարությամբ: Ցողունները ունենում են բեղիկներ, որոնցով կառչում են ուրիշ բույսերի: Տերևները երկարակոթուն են, հերթադիր դասավորությամբ: Շաղիկներն սպիտակադեղնավուն են, բավական խոշոր: Բաժակաթերթերը հինգ հատ են, ոչ լրիվ միակցված: Առէջները նստած են երկար ծաղկակոթուններին: Վարսանդները փոքր չափերով առաջացնում են վահանաձև պարկ: Պտուղը հյութալի է, կլոր, սև: Լոշտակը ծաղկում է ամռան կեսերից:
Քիմիական բաղադրությունը: Լոշտակի արմատը պարունակում է խեժ` բրիոռեզին, գլիկոզիդներ` բրիոնին, բրիոնիցին, բրիոնիդին և բրիոնոլ: Պարունակում է նաև ֆիտոստերին, միկրոտարրեր, մանրէասպան հատկությամբ օժտված նյութեր: Սերմերը պարունակում են կարոտիններ, վիտամիններ:
Օգտագործման եղանակը: Բժշկության մեջ օգտագործել են լոշտակի արմատը և ցողունը` տերևների ու սերմերի հետ միասին: Լոշտակն իր բուժիչ հատկությունների շնորհիվ գովերգվել է մեր ազգային լեգենդներում:
Բուլղարական բժշկության մեջ լոշտակն օգտագործել են փորկապության և հոդատապի բուժման նպատակով:
Հայկական բժշկության մեջ լոշտակն օգտագործել են լնդախտի, քթանցքների մսամոլի, հոդատապի, որովայնային խիթքի, սննդախանգար խոցերի, քաղցկեղի, ստամոքսաբորբի, միզաքարային հիվանդության, լուսնոտության, զարկերակային արյան ճնշման ցածրացման (հիպոտոնիա), սեռական թուլության, ուղեղային անոթների կարծրախտի, փայծաղի բորբոքումների, ջրգողության, ոսկրային հյուսվածքի կոտրվածքների փայտացման (տետանուս) բուժման համար:
1. Լոշտակի սերմերն աղալ և օրը 3 անգամ 1-ական թեյի գդալ խմել` սեռական թուլության, ուղեղային անոթների կարծրախտի բուժման համար:
2. Լոշտակի արմատն աղալ, քամել, 200 գ մզվածքին ավելացնել 200 գ մեղր, լավ խառնել և օրը 3 անգամ 1-ական թեյի գդալ խմել` լուսնոտության, արյան ճնշման ցածրացման, տեսողության վատացման, քաղցկեղի, ուղեղային խանգարումների բուժման համար: Այդ նույն խառնուրդով կարելի է կատարել բերանի խոռոչի ողողումներ` լնդախտի և բերանի խոռոչի բորբոքումների բուժման համար:
3. 100 գ լոշտակի արմատի մզվածքի վրա ավելացնել 1 լ գինի, լավ խառնել և օրը 3 անգամ 1-ական ճաշի գդալ խմել` լյարդի դռներակի բորբոքումների, ջրգողության բուժման համար:
4. 500 գ լոշտակի ծիլերն աղալ, դնել հանդարտ կրակին և այնքան եփել, մինչև մնա ծավալի մեկ երրորդ մասը, որից հետո վրան ավելացնել հավասար քանակությամբ մեղրաջուր, լավ խառնել ու օրը 3 անգամ 100-ական գ խմել` ստամոքսաղիքային ուղու բորբոքումների և երիկամների բորբոքային հիվանդությունների բուժման համար:
5. Լոշտակի ծիլերը ծնեբեկի հետ միասին աղալ, քամել և մզվածքից օրը 3 անգամ 1-ական ճաշի գդալ խմել` միզաքարային հիվանդության բուժման համար: