ՋՐԱՌՎՈՒՅՏ – ВАХТА ТРЕХЛИСТНАЯ

Բազմամյա խոտաբույս է, պատկանում է ջրառվույտազգիների ընտանիքին: Արմատը հաստ է, սողացող, բազմաթիվ երկրորդական արմատներով: Տերևներն իրենց երկար կոթուններով առաջանում են արմատավզիկից: Կոթունները հիմքի մոտ լայն են և առաջացնում են տերևապատյան: Առանձին տերևները կարճակոթուն են, ձվաձև, մերկ, ընդհանրապես ամբողջական եզրերով: Ծաղիկներն ուղիղ են, կարճ ծւսղկասյուների վրա, սպիտակ կամ վարդագույն ծաղկաթերթերով: Պսակաթերթերը հինգն են, առէջները` նույնպես: Պտուղը կլոր կամ ձվաձև տուփիկ է, բացվում է երկփեղկով: Սերմերը բավական խոշոր են, ձվաձև, փայլուն, դարչնագույն: Ծաղկում է մայիս-հունիս ամիսներին: Պտուղները հասունանում են հուլիս-օգոստոս ամիսներին:
Քիմիական բաղադրությունը: Ջրառվույտի տերևները պարունակում են դառը գլիկոզիդային նյութեր, գլխավորը մենիանտին, մելիատին, քիչ քանակությամբ ֆլավոնային գլիկոզիդներ` ռուտին, գիպերոզիդ և այլն, դաբաղանյութեր, չնչին քանակությամբ ալկալոիդ, գենցիամիդ, ինչպես նաև խոլին, ճարպայուղ, խեժաթթու և այլն:
Օգտագործման եղանակները: Բժշկության մեջ օգտագործել են ջրառվույտի տերևները` առանց կոթունների:
Բուլղարական բժշկության մեջ ջրառվույտն օգտագործել են ախորժակի բացակայության, մարսողական ուղու խանգարումների, թթվայնության ցածրացման, սրտխառնոցի, գլխացավի բուժման համար:
Հայկական բժշկության մեջ ջրառվույտն օգտագործել են մարմնի դողի, կանանց կաթի պակասի, սրտխառնոցի, արյունաստեղծ օրգանների հիվանդությունների բուժման համար:
1. Ջրառվույտի տերևների մզվածքից օրը 3 անգամ 1-ական ճաշի գդալ խմել` մարմնի դողի, կանանց կաթի պակասի բուժման համար:
2. 20 գ ջրառվույտի չորացած տերևների վրա ավելացնել 300 մլ սառը ջուր, թողնել 8 ժամ, Իետո քամել և օրը 3 անգամ 100-ական գ խմել` մարսողական ուղու խանգարումների, ախորժակի կորստի, ստամոքսի թթվայնության պակասի, սրտխառնոցի, արյունաստեղծ օրգանների խանգարումների և գլխացավի բուժման համար: Կարելի է օգտագործել նաև չորացած տերևների աղացած զանգվածը` օրը 3 անգամ 2-ական գ` հետը օգտագործելով թարմ կաթ: