ԲՈԳ-ՕՁԻ ՍԽՏՈՐ - ГОРЕЧАВКА ЖЕЛТАЯ

Բազմամյա խոտաբույս է, պատկանում է բոգազգիների ընտանիքին: Ցողունն ուղղաձիգ է, չճյուղավորված, մինչև 1,5 մ բարձրությամբ: Տերևները հակադիր են, խաչաձև դասավորությամբ, ունեն 15 սմ երկարություն, ձվաձև են, աղեղային ջղերով: Ծաղիկները փնջերով հավաքված են ոստափնջերում` մի քանի զույգ վերևի տերևածոցերում: Բաժակը խողովակաձև է, կազմված է 5-6 բաժակաթերթերից: Պսակաթերթը դեղնանարնջագույն կամ դեղին է, կարճ խողովակով, առէջները հինգն են` փոշեհատիկներով: Պտուղը կազմված է երկու պտղաթերթերից` վերևի սերմանարանով: Պտուղը բազմասերմանի տուփիկ է, միացած երկու կարով: Բոգը ծաղում է ամռանը:
Քիմիական բաղադրությունը: Պարունակում է դառը նյութեր, ածխաջրեր, ճարպայուղ, ալկալոիդներ:
Օգտագործման եղանակները: Բժշկության մեջ օգտագործում են արմատը:
Ռուսական բժշկության մեջ բոգն օգտագործել են ախորժակի բացակայության, լեղապարկի կենսագործունեության խանգարման բուժման համար:
Բուլղարական բժշկության մեջ բոգն օգտագործել են ստամոքսի լորձաթաղանթի բորբոքման, ստամոքսաղիքային խիթքի բուժման համար:
Հայկական բժշկության մեջ բոգն օգտագործել են լյարդի և փայծաղի բորբոքումների, դաշտանի խանգարման, գոտկային ցավերի, օձի կծածի, թունավորվածության, հաստ աղիքի լորձաթաղանթի բորբոքումների, ստամոքսաղիքային ուղու խանգարումների բուժման համար:
Բոգի արմատն աղալ և օրը 3 անգամ 1-ական ճաշի գդալ ուտել (ուտելուց մեկ ժամ հետո), լյարդի և փայծաղի բորբոքային հիվանդությունների, դաշտանի խանգարման, օձի և կարիճի կծածի, թունավորածների, ստամոքսաղիքային ուղու խանգարումների, հաստ աղիքի լորձաթաղանթի բորբոքումների, գոտկային ցավերի բուժման համար: Ըստ Ամիրդովլաթի, բոգի հակաթույնը գաբծիլն է, փոխարինողը կապառի արմատը: