ՋՐԱՊՂՊԵՂ - ГОРЕЦ ПЕРЕЧНЫЙ

Միամյա խոտաբույս է, պատկանում է մատիտեղազգիների ընտանիքին: Ջրապղպեղն ունի բարակ արմատներ և ուղղաձիգ, ճյուղավորված, հանգուցավոր, սնամեջ ցողուն: Ցողունը կարմրավուն է, հանգույցներում հաստացած: Տերևները հերթադիր են դասավորված և նշտարաձև են: Ներքևի տերևները կարճակոթուն են, վերևինները` առանց կոթունի, հիմքի մոտ նեղ շերտաձև, կարմրագույն ժապավենով, որը խողովակաձև գրկում է ցողունը: Ծաղիկները մանր են, աննկատելի, հավաքված ցողունի և ճյուղերի ծայրում: Շաղկապատյանը հասարակ է, կանաչավարդագույն, գեղձային կետերով, բաժանված 4-5 բութ մասերի: Առէջները 6-8 հատ են, վարսանդը` 2-3 հատ: Պտուղը ձվաձև է, բութ կողերով: Սերմը մուգ դարչնագույն է կամ սև գույնի: Ծաղկում է հունիսից մինչև սեպտեմբեր: Պտուղները հասունանում են մինչև հոկտեմբեր:
Քիմիական բաղադրությունը: Ջրապղպեղի վերգետնյա մասը պարունակում է ֆլավոնոիդներ` ռուտին, կվերցիտրին, կվերցիտին, գիպերոզիդ և կեմֆերոլ, ինչպես նաև դաբաղանյութեր, վիտամիններ և մի շարք այլ օրգանական թթուներ (մրջնաթթու, վալերինաթթու և քացախաթթու):
Օգտագործման եղանակները: Բժշկության մեջ օգտագործում են ջրապղպեղի վերգետնյա մասը` ծաղիկի հետ միասին:
Բուլղարական բժշկության մեջ ջրապղպեղն օգտագործել են ներքին արյունահոսությունների, բոտն դաշտանի, լուծի, մարսողական ուղու խոցերի բորբոքումների բուժման համար:
Հայկական բժշկության մեջ ջրապղպեղն օգտագործել են ուռուցքների, թարախակալված վերքերի, սպիների, պեպենների, ներքին արյունահոսությունների, բուռն դաշտանի, թութքի, արյունային լուծի, ստամոքսի և տասներկումատնյա աղու խոցերի բուժման համար:
1. Ջրապղպեղի տերևները ծաղիկների հետ միասին ծեծել և դնել ուռուցքների, թարախակալված վերքերի վրա` դրանց բուժման համար:
2. Ջրապղպեղի կանաչ սերմերը ծեծել, ձվի դեղնուցով շաղախել և քսել պեպեններին և սպիներին` դրանք վերացնելու համար:
3. 30 գ ջրապղպեղի տերևների և ծաղիկների վրա ավելացնել 300 մլ եռացրած ջուր և թողնել 2 ժամ, որից հետո քամել և օրը 3 անգամ, ուտելուց 20 րոպե հետո 50 գ խմել` անոթային հիվանդությունների, բուռն դաշտանի, ներքին արյունահոսության, արյունային լուծի, թութքի (հեմոռոյի) և տասներկումատնյա աղիքի խոցերի բուժման համար: Նշված հիվանդությունների դեպքում կարելի է օգտագործել նաև չորացած ջրապղպեղը` փոշու ձևով` օրը 3 անգամ 3-ական գ ուտելով: