Միամյա խուտաբույս է, պատկանում է աստղածաղկազգիների ընտանիքին: Բույսն ունի մինչև 1 մ բարձրություն և բարակ առանցքային արմատ: Ցողունն ուղղաձիգ է, երկար ճյուղերով, ժանիքի նման կեռված: Տերևները նշտարաձև են, կոթունավոր, ստորին ցողունայինները` ամբողջական, նստադիր: Վերևի` գագաթնային տերևները նեղ-գծավոր են: Արմատավզիկի մոտ եղած տերևները մեռնում են ծաղկելուց առաջ: Ծաղիկները լինում են միայնակ զամբյուղով և երկար ծաղկակոթունով: Պատյանը երկարավուն է, եռանկյուն, կարճ ծոփքերով: Եզրային ծաղիկներն անպտուղ են, ձագարաձև, կապույտ կամ երկնագույն, հազվադեպ` սպիտակ: Ներսի ծաղիկները երկսեռ են, խողովակաձև, մանուշակագույն: Պտուղը սերմապարկ է` ծածկված խիտ աղվամազով: Բույսը ծաղկում է հունիս-օգոստոս ամիսներին: Սերմերը հասունանում են օգոստոս-սեպտեմբեր, ինչպես նաև հոկտեմբեր ամիսներին:
Քիմիական բաղադրությունը: Ծաղիկները պարունակում են գլիկոզիդ` ցենտաուրին, ցիկորին: Կարևոր նշանակություն ունեն ծաղիկներում եղած անտոցիտները: Սերմերը պարունակում են ճարպայուղ, տերևները` ֆլավոնոիդ, գլյուկոզիդ, ասկորբինաթթու:
Օգտագործման եղանակը: Բժշկության մեջ օգտագործում են ծաղ-կազամբյուղները, տերևները, սերմերը:
10 գ ծաղկազամբյուղ մանրացնել, վրան լցնել 300 մլ եռացրած ջուր, թողնել 15 րոպե, օրը 100-ական գ խմել` ախորժակի բացակայության, ստամոքսաաղիքային ուղու բորբոքումների, մարսողության խանգարման բուժման համար: