ԹԹՎԱՌՎՈՒՅՏ - OXALIS - КИСЛИЦА

Պատկանում է թթվառվույտների (Oxalidaceae) ընտանիքին։ Հայրենիքը Հարավային Եվրոպան և Ամերիկան է (Չիլի)։ Հնդկոտեմաձև թթվառվույտը (0, tropaeoloides Hook, folisatropurpureus) միամյա, փռվող, եռատերև բույս է, մոտավորապես 10 սմ բարձրությամբ։ Տերևները մուգ դարչնագույն են, թթվաշ համով։ Ծաղիկները մանր են և ունեն դեղնավուն երանգ։ Լավ է աճում արևոտ ու լուսավոր հողամասերում։ Սովորաբար տնկում են բույսը բույսից 8—10 սմ հեռավորության վրա։ Խոնավության նկատմամբ պահանջկոտ չէ, սակայն Երևանի չոր ցամաքային կլիմայի պայմաններում պահանջում է առատ ոռոգում։
Բազմանում է սերմերով։ Սերմերը փոքր են, կլոր, դարչնագույն մեկ գրամում պարունակվում է մոտավորապես 4200 հատիկ։ Ծլունակությունը պահպանում է 2—3 տարի, ծլում է 8—10 օրում։ Սերմնահավաքը պետք է կատարել հաճախակի և զգուշությամբ, քանի որ աննշան հպումիցսերմնապատիճները պայթում և սերմերը թռչում են այս ու այն կողմ։
Բացի սերմերը հավաքելու սովորական եղանակից, կարելի է կիրառել նաև հետևյալ մեթոդը, քանի որ թթվառվույտի սերմերը հասունանալիս ցրիվ են գալիս և դրանք դժվար է հավաքել, ապա կարելի է աշնանը այն հողամասից, որտեղ ամռանը թթվառվույտ է մշակվել, հողի վերին շերտը 1-1/2 սմ հաստությամբ վերցնել և տեղափոխել ջերմատուն։ Ցանքարկղերը լցնելով սովորական ցանքի հողով, վերևից լցնում են այդ հողը և ջրում։ Այս եղանակով բույսերի աճեցումը մեծ մասամբ ավելի լավ արդյունք է տալիս, քան սերմերով կատարած ցանքը։
Թթվառվույտն ունի նաև իր բազմամյա տեսակները, որոնցից, օրինակ O. esculenta-ի պալարները կարելի Է օգտագործել որպես սնունդ։